أنا مستغرب من ان فى لسه ناس متعاطفة مع حسنى ياجماعة فى فرق بين مصر و شخص الرئيس ، حسنى هو اللى أهان نفسه لما ظلم وافترى وساب كلابه تخرب البلد ،أما فصة احترام سنه و شيبته فالكلام دا فى العلاقات العامة بين الأهل و الجيران فى الحى أما بالنسبة للسياسة فالموضوع مختلف لأن القرار بيصنع مصير شعب ! كلكم عارفين ان حسنى كان هايجيب جمال بعديه لولا ان الثورة قضت على الحلم دا ، احنا كنا هنبقى عزبة بيورثها لابنه و شلته اللى هيا أصلا خربت البلد فى الست سنين اللى فاتوا من ساعة مارجع جمال وبدأ مشروع التوريث ، وحكاية مين يجى رئيس فاقدر اقولكو ان بلد سكانها 85 مليون لازم يكون فيها من يصلح للحكم و هناك فعلا شخصيات مثل (عمرو موسى _ الدكتورأحمد زويل _البرادعى _ المستشار جودت الملط _ كمال الجنزورى _ وغيرهم كتير وبغض النظر عن مين ييجى فالمهم اذاى هاييجى يعنى ببساطة لو الشعب هوا اللى جاب الريس بارادته هايكون حريص على ارضائه والضامن لذلك هو الشعب نفسه اللى ممكن يطيره لو حس انه هايظلم و يتكبر على الناس و يجيب غيره و بكده نكون اتعلمنا درس فى كيفية ممارسة الديمقراطية ينعكس على اختيارتنا بعد ذلك ، المشكلة الرئيسية ان التوريث و التمسك بالكراسى طال كل المؤسسات فدكتور الجامعة عاوز يجيب ابنه معيد والظابط و النائب فى مجلس الشعب و القاضى كلهم عاوزين يورثوا كراسيهم ودا خلا الواسطة و الفساد ينتشروا بشكل منظم من رأس النظام الى أسفله ، و أكتر حاجة تخنقنى ان حد يقولى ان حسنى ماكانش يعرف اللى بيحصل و اللى حواليه هم السبب و الى هؤلاء أقول ( اذا كان يعلم فتلك مصيبة ... وان لم يكن يعلم فالمصيبة أعظم ) يا شعب خلونا نبتدى عهد جديد نتغير فيه و نبنى نظام جديد يرجع مكانة مصر و يلحقنا بركب الحضارة اللى اتخلفنا عنه ... عاوزين عدل و حرية وكرامة
ليست هناك تعليقات:
إرسال تعليق