أفـندينا أنـعم علينا بعـلاوة
تجيب كيلو جبنة وعلبة حلاوة
أتـاري العلاوة مجرد إتـاوة
وإحـنا علينا الكلام إخـتلط
*********************
عشان في البداية حسبناها خير
وقلنا نواية حتسند يا زير
وحسنة حتمنع بلاوي كتير
وكنا حقيقي في غاية العبط
*********************
في لحظة أفتكرنا إن لينا حقوق
ونمنا وصحينا لقينا الخازوق
وقبل أما حتى يا عالم نفوق
لقينا اللي لسه حناخده إتشفط
********************
أفندينا يعني في لحظة تجلي
تعطف تلطف وقرر يخللي
مساحة الغلابة تزيد ستة مللي
وياكلوا بدال التراب الزلط
*******************
أفندينا أعلن صدور القرار
وقبل أما ينجح في أي إختبار
فوجئنا بزفة ومولد وزار
قصايد.. جرايد.. برامج.. يفط
*********************
تؤكد بأن الحكومة.. بذكاء
ومن حزمة واحدة قضت ع الغلاء
ولابد يبقى لدينا.. إنتماء
وناكل ونشرب ونلبس خطط
**********************
عقبال النمو اللي قالوا عليه
وحايشينه عنا ما نعرفش ليه
ما تلمح مكانه في مراية عينيه
ونقدر ندوق منه.. حتى نقط
************************
مادام كل حاجة تمام ع الورق
مفيش أي داعي عشان القلق
ولو مش مصدق خلاص إتفلق
ورقِنا اللي صح وكلامك غلط
***********************
قاللي مواطن عليم بالخبايا
أفندينا قرر تزيد الجباية
عشان شعبه جاحد قليل الرباية
بياكل و ينكر زي القطط
*************************
إذا الشعب صدى بفعل البارومة
حاتعمل حسابه ف إيه الحكومة
وهي اللي جاهزة بكرباج وشومة
عشان لو في واحد في عقله إتخبط
************************
تعيش مصر دايماً في "عز" و"جمال"
يعيش المواطن شـديد الإحتمال
وآمن تماماً من الإشــــتعال
وأقصى ما عنده…. ينكت فقط
____________________
(*)القصيدة من تأليف عمنا الفاجومى "أحمد فؤاد نجم"
ليست هناك تعليقات:
إرسال تعليق