نؤيد سيادتك لفترة جديدة
نكمل خلالها المسيرة السعيدة
وبالمرة فيها نبيع الحديدة
مفيش حاجة تانية نبيعها خلاص
…………………………..
نؤيد سيادتك لأجل المزيد
من الي تحقق بفضلك اكيد
بقينا خلاص ع الحميد المجيد
وربك لوحده ف ايده الخلاص
……………………………..
نبايع سيادته ولا حد غيره
كفاية علينا نبرطع في خيره
ونوم شعب مصر العظيمة وشخيره
يقول للحرامي ما تسرق كمان
……………………………
نبايع سيادته وابنه وحفيده
مفيش زي فكرة قديمه وجديده
خرابك يا مالطة هيحصل بايده
ومين فيكي يعني بيسمع آذان
……………………………..
نبوس ايد سيادتك ورجلك كمان
تخليك معانا ياريس عشان
وجودك ضرورة فرضها الزمان
ومن غير وجودك حقيقي نضيع
…………………………………….
دي مصر بتاعتك واحنا ضيوفك
كفاية علينا ياريس نشوفك
وعاذرين سيادتك وفاهمين ظروفك
عليك بس تؤمر واحنا نطيع
…………………………………
في جزمة سيادتك كلابك يبوسوا
وفوق الغلابة بجزمهم يدوسوا
وشعبك ليلاتي ياريس غموسه
مذلة ومهانة وحوجة ومر
………………………………..
لكن يعني مادمنا شعب انتساب
ودايما وأبدا ف حالة غياب
متعملش لينا يا ريس حساب
دي عزبة سيادتك وفيها انت حر
……………………………
ودستور مدستورش مش فارقة خالص
كلام فاضي كله يافندم بناقص
كفاية علينا الفساد الي ماصص
عرقنا ومعشش وضارب جذوره
……………………………….
وايه يعني تهري جتتنا البلاوي
يوماتي كوارث فضايح رشاوي
كفاية علينا القعاد في القهاوي
بنستنى لما الوريث ييجي دوره
_______________________
(*) القصيدة من تأليف عمنا الفاجومى "أحمد فؤاد نجم"
ليست هناك تعليقات:
إرسال تعليق