امبارح و أنا قاعد بتكلم مع العيال اصحابى على حال البلد و أخبار الاعتصامات ؛ لاقيت تليفونى بيرن ولما رديت لاقيت واد صاحبى بيقولى " الحق افتح التليفزيون اللواء (الحنجرى) بيقول بيان مهم " ؛ رحت رامى التليفون و جريت على التليفزيون ؛ أصل أنا بحب سيادة اللواء وبتفائل بيه ؛ لكن بمجرد ما فتحت التليفزيون لاقيت صباع سيادة اللواء خارجلى من الشاشة و راح مخزق عينى اليمين !!! بصراحة اتفاجئت أصلى كنت متوقع انه يعملى تعظيم سلام زى زمان !!! المهم ؛ رجعت لورا خطوتين و أخدت ساتر و قلت فى نفسى يا واد أكيد سيادة اللواء ما كانش واخد باله ، ما فيش دقيقتين و لاقيت سيادة اللواء عمال يشخط و ينطر فيا ؛ رغم انى والله العظيم ماعملتله حاجة !!! ساعتها قولت أكيد حد من العيال اصحابى الفاقدين عمله حاجة زعلته ؛ رحت مدور الضرب فى العيال و قلتلهم " عملتوا ايه لسيادة اللواء يا ولاد الكلب يا جزم ؟؟؟ دا الراجل كان بيعملى تعظيم سلام الأول ؛ و دلوقتى بيتخن صوته عليا و نازل تخزيق فى عينى !!! " ؛ لكن العيال قعدوا يحلفولى بأيمنات المسلمين و المسيحيين انهم ما جوش جنبه ولا كلموه كلمة واحدة !!! أنا بصراحة قلت يمكن العيال ولاد سيادة اللواء أو الست حرمه مزعلينه فى حاجة ، و بما ان الراجل رصيده عندنا يسمح فاحنا لازم نستحمله شوية ، المهم رجعت أتابع الخطاب يمكن أفهم حاجة أو سيادة اللواء يشكيلى من العيال ولاده اللى مطلاعين عينه ،،، و فجأة لاقيت سيادة اللواء بيحمرلى فى عينه و نازل فيا شخط و زعيق !!! أنا قلت مابدهاش و رحت مقاطع كلامه و سألته " هوا فى ايه يا سيادة الواء ؟؟؟ حد زعلك و أنا أطلعلك عينه ؟؟؟ " ؛ راح سيادة اللواء باصصلى بقرف و شخط فيا بصوته التخين و قالى " اثبت مكانك يا عسكرى ... انتبااااااه " !!! عسكرى !!! هوا الراجل دا بيكلم مين بالظبط ؟؟؟ أنا بصراحة اتخضيت خاصة لما لاقيته بيرفع ايده و اتوقعت ان كفه التخين هاينزل على قفايا السفيف بقفا عباسى صعيدى شحط محط ؛ لكن الحمد لله طلع بيهوش و رجع للشخط و الزعيق و تحمير العين تانى و كأنه نسينى خالص !!! فضلت واقف انتباه أنا و العيال اصحابى الصيع لحد ما سيادة اللواء خلص زعيق ؛ و أول ما لاقيته خلص قلتله " ليه كدا يا سيادة اللواء ؟؟؟ دنا بحبك و الله العظيم من أيام التعظيم سلام بتاع الشهدا !!! يا راجل دنا حتى شيلت صورتى من على البرفايل بتاعى عالفيس بوك و حطيت صورتك بدالها !!! هيا دى أخرتها يا سيادة اللواء ؟؟؟ هوا انت فاكر ان تحمير العنين و للا الشخط و الزعيق و للا حركات الصوابع ؛ هاتاكل معانا و للا هاتخوفنا ؟؟؟ يا باشا دا جيل فاقد مايكلش معاه الحركات دى نهائيا ؛ انتوا لسا مافهمتوش و للا ايه ؟؟؟ الجيل دا مابيجيش غير بالسياسة ؛ و انت بنفسك جربت لما عملت تعظيم سلام للشهدا ؛ شوفت كان رد فعل الشباب ايه ؟؟؟ دول كانوا ناقصين يعملولك تمثال فى ميدان التحرير !!! يبقى ليه تنهى رصيدك عندنا بالزعيق و الشخط و النطر ؟؟؟ انت نسيت ان دا بيان سياسى للجماهير المدنية مش بيان عسكرى للعساكر و الظباط بتوعك !!! على فكرة يا سيادة اللواء الكلام اللى فى البيان مش وحش و كان ممكن نفرح بيه لو كلمتنا بالسياسة !!! نصيحة منى يا سيادة اللواء ما تطلعش تقول بيانات تانى و يستحسن تنزلها على الفيس بوك مكتوبة و احنا هنقراها ؛ أو ممكن تستعين بيا و أنا أبقى أقرا البيانات للناس و انت تقف جنبى و تعمل تعظيم سلام "
فجأة لاقيت الست الوالدة بتصحي فيا و تقولى " اصحى كفاياك نوم ؛ دا انتوا جيل مهبب " !!! اتفزعت و قمت من السرير و أنا عمال أفكر فى حكاية سيادة اللواء !!! بعد شوية بفتح التلفزيون ؛ لاقيت صباع سيادة اللواء (محسن الفنجرى) طالعلى بره الشاشة و راح مخزق عينى الشمال :))
ولا عنيك الشرقية
ردحذف